Арзамасский Николаевский женский монастырь

↑ Grab this Headline Animator

29-30.08.2017 Погребение Божией Матери

29-30.08.2017 Погребение Божией Матери


По выносе Плащаницы Божией Матери до Ея Погребения в храме обители сестры читали Псалтирь Божией Матери перед Ее Плащаницей.

01-10092017

Под Твое благоутробие приегаем, Богородице Дево, молитв нашех не презнри в скорбех, но от бед избави нас, едина чистая и благословенная.

Госпоже, устне мои отверзеши, и уста моя возвестят хвалу Твою.

Госпоже моя, в помощь мою вонми. Слава Тебе, сирот Мати, сотвори нам милостива Вседержителя Бога.

02-10092017

Покланяемся и почитаем болезни Твоя, яже претерпела еси во время вольныя страсти Сына Твоего, егда сбыстся Симеоново проречение: Тебе же Самой душу оружие пройдет, и молим Тя, Свете наше, болезни душевныя и телесныя избави нас.

Покланяемся Тебе, Госпоже, воспоминающе радость Твою, юже имела еси во время Воскресения Сына Твоего, и молим Тя, Свете наш, радости духовныя не лиши нас.

03-10092017

Покланяемся честному и славному успению Твоему, и молим Тя, свете наш, успи страсти наша плотския помощию Твоею.

О, Пресвятая Владычице Богородице! приими сие малое моление и принеси е Сыну Твоему и Богу нашему, да спасет и просветит Тебе ради души наша.

На Твой пресвятый образ взирая, яко истинную самую Тя зрим сущую Богородицу, верою сердечною и любовию от души припадаем и покланяемся с предвечным и на руку Твоею держимым младенцем, Господом нашим Иисусом Христом…

Приклони, о, Госпоже, пречистыя Своя ушеса к молитве нашей, приносимой Тебе от нас, непотребных и недостойных рабов Твоих.

О, Мати наша милосердая! яви на нас милость Свою, в печали сущих и во гресех всегда пребывающих, и не презри нас, многогрешных рабов Твоих.

О, Мати наша прекрасная! всех благих Ты еси вина, смертных человек оживление и погибших избавление, приими недостойное наше сие моление, падших и многогрешных рабов Твоих, в час сей горькаго, и плачевнаго, и болезненнаго нашего прошения, яко дерзаем ныне глаголати к Тебе, Пресвятей Госпоже Царице Богородице, сие моление и радостное со Ангелом приглашение сицево: Богородице Дево, радуйся, благодатная Марие

Радуйся, яко Ты сама на небо взята еси. Радуйся, яко Ты девством Ангелов и славою Святых превосходиши. Радуйся, яко Ты на земли мир твориши. Радуйся, яко Тебе жители небеснии вси послушны суть. Радуйся, яко Ты еже хощеши, у Сына Твоего, Христа Бога нашего, испросити можеши. Радуйся, яко сподобилася еси быти близь Пресвятыя Троицы. Радуйся, яко Ты Мати людей озлобленных, иже к Тебе прибегают. Радуйся, яко Твоя радость во век не скончается. Радуйся, Благодатная, Господь с Тобою!

О, Пресвятая Госпоже Владычице, Дево Богородице! приими недостойную молитву нашу, и сохрани нас от наглыя смерти, и даруй нам прежде конца покаяние.

Чин погребения Пресвятыя Богородицы. Похвалы, или священное последование на святое преставление Пресвятыя Владычицы нашея Богородицы и Приснодевы Марии, 30.08.2017

04-10092017

Егда во гробе, Мариам, в Гефсимании положилася еси плотию, естества Оживотворительнице, тогда вся тварь, зрящи Тя, ужасеся: Творец же дух твой, руце распростер, благодатне прият, яко должник Сын. Еже безплотных чини зряще, со страхом вопияху: слава восхождению Твоему, Любоблагая.

Яже Небес вышшая сущи, и Херувим славнейшая, и всея твари честнейша, яже премногия ради чистоты, Присносущаго Существа приятелище бывши, в Сыновне руце днесь всесвятую предает душу, и с нею исполняются всяческая радости, и нам дарует велию милость.

05-10092017

Матушка-игумения Филарета с сестрами обители сея

О дивное чудо! Источник Жизни во гробе полагается, и лествица к Небеси гроб бывает. Веселися Гефсимание, Богородичен святый доме. Возопием вернии, Гавриила имуще чиноначальника: Благодатная радуйся, с Тобою Господь, подаяй мирови Тобою велию милость.

06-10092017

Служащий батюшка иерей Николай (Молодцов)

Каждение на «Господи, воззвах…»

Твое славят успение Власти и Престоли, Начала и Господства, Силы и Херувимы, и страшнии Серафимы, радуются земнороднии, о Божественней Твоей славе красящеся, Ппипадают царие, со Архангелы и Ангелы, и воспевают: Благодатная радуйся, с Тобою Господь, подаяй мирови Тобою велию милость.

07-10092017

Свете Тихий святыя Славы Безсмертнаго Отца Небеснаго, Святаго Блаженнаго, Иисусе Христе, пришедше на запад солнца, видевше свет вечерний, поем Отца, Сына и Святаго Духа Бога. Достоин еси во вся времена пет быти гласы преподобными, Сыне Божий, живот даяй, темже мир Тя славит.

08-10092017

Чтение паримий

Притчей чтение.

Премудрость созда себе дом, и утверди столпов седмь. Закла своя жертвенная, и раствори в чаши своей вино, и уготова свою трапезу. Посла своя рабы, созывающи с высоким проповеданием на чашу, глаголющи: иже есть безумен да уклонится ко мне. И требующим ума рече: приидите, ядите мой хлеб, и пийте вино, еже растворих вам. Оставите безумие, и живи будете. И взыщите разума, да поживете, и исправите разум в ведении. Наказуяй злыя, приимет себе безчестие, обличаяй же нечестиваго, опорочит себе. Обличение бо нечестивому – раны ему. Не обличай злых, да не возненавидят тебе обличай премудра, и возлюбит тя. Даждь премудрому вину, и премудрший будет, сказуй праведному, и приложит приимати. Начало премудрости – страх Господень, и совет святых – разум. Разумети бо закон помысла есть благаго: сим бо образом многое поживеши время, и приложатся тебе лета живота.

09-10092017

Освящение хлебов

Егда от мира, Жизнь сущи, рождшая Жизнь всяческих, Сына Божия во плоти, вземлема была еси восходящи во входы Божественныя, Небесныя, Чистая, тогда  чудо сбысться, еже возгласи Дух Святый: кто Сия, ныне восходящая от пустыни? Вся же со страхом вопияху: слава восхождению Твоему, Любоблагая.

10-10092017

Тебе, одеющагося светом яко ризою, Сына Божия рождшую, лик учениик Его видев мертву, во гробе мрака исполненном, простерту, благосердный плачь восприим, рыдая глаголаше: увы мне, сладчайшая Мариам, Юже вмале имех утешение, и видя Тебе, мнех Учителя моего зрети: но се, ныне вижду Тя по закону естества подъемшу смерть. О, како Тя погребу Дево, или како плащаницами обвию? Киима же рукама прикоснуся нетленному Твоему телу? Или кия песни воспою, Твоему исходу достойныя? Како же стерплю, Госпоже, Твое скорбное ми отшествие? Или како безтрудно понесу всетяжкое сиротство? Недоумеваю, блаженная Богородице Марие, и болезненным сердцем соплетаю песнопения, и величаю Тя, Владычице: песнословлю зачатие Твое, почитаю Твое Божественное рождество, чту вхождение Твое, Дево. Ублажаю же успение Твое, и всесвятое погребение Твое со преставлением, зовый: Господи, слава Тебе.

Егда снизшла еси к смерти, Живота Мати безсмертная, тогда ад удивися и ужасеся страшно, егда же узрелася еси преставльшися на Небеса, Мариам, от гроба, вся силы Небесныя взываху: живоносная Мати Живота нашего, слава Тебе.

11-10092017

Приидите, вси концы земнии, честное преставление Богоматере восхвалим: в руце бо Сына душу непорочную положи. Темже святым успением Ея мир оживотворися: и ныне во псалмех и пениих и песнех духовных, со безплотными и апостолы празднует светло.

12-10092017

Чтение 17-й кафизмы с похвалами

Блажени непорочнии в путь, ходящии в законе Господни. Жизнь, во гробе положился еси, Христе, и Матерь Живота полагается: странное видение Ангелом и человеком.

Блажени испытающии свидения Его, всем сердцем взыщут Его. Величаем Тя, Богородице честая, и чтим святое Твое успение, и покланяемся честному гробу Твоему.

Тогда не постыжуся, внегда призрети ми на вся заповеди Твоя. Вся земля славит погребение Твое, Христе, и поет, Владыко, погребальная пречистыя Твоея Матери всеблагоговейно.

В заповедех Твоих поглумлюся, и уразумею пути Твоя. Отверзи, Мати, честныя Твои очи, и на чад собранных призри, Твое успение славящих честно.

Путь неправды отстави от мене, и законом Твоим помилуй мя. Все души святых праотец и пророк и праведник снидошася, исходную приносяще песнь.

13-10092017

Ужа грешник обязашася мне, и закона Твоего не забых. Богородице Дево, радосте наша, Богородице проповедание наше, Богородице, камо отходиши от нас?

Умножися на мя неправда гордых, аз же всем сердцем моим испытаю заповеди Твоя. Светоносный свещник незаходимаго Света под землею вмале сокрывается, но полагается светло на высоте.

Руце Твои сотвористе мя, и создасте мя: вразуми мя, и научуся заповедем Твоим. Достойно есть величати Тя, Богородице, душу божественную и непорочную в руце Бога положившую.

Яко аще бы не закон Твой поучение мое был, тогда убо погибл бых во смирении моем. Предстоиши ныне Божеству Триипостасному, лицем к лицу зрящи, идеже лица покрывают Серафими.

Приидите, празднолюбных собор, приидите, и лик составим, приидите венчаем песньми Церковь, упокоением Ковчега Божия. Днесь бо Небо простирает недра, приемля Рождшую всеми Невместимаго, и земля, Источник Жизни, отдающи благословение, украшается благолепием. Ангели лик составляют со апостолы, ужасно взирающе, от живота в Живот преставляему, Рождшую Начальника жизни. Вси поклонимся Ей, молящеся: сродна присвоения не забуди, Владычице, верно празднующих всесвятое Твое успение.

14-10092017

Воспойте людие, Матери Бога нашего, воспойте: днесь бо всесветлую душу Свою в пречистыя длани, Иже из НеяВвоплощшагося без семене предает, Егоже и молит непрестанно, даровати вселенней мир, и велию милость.

Достойно есть величати Тя, Жизнодавца, возвеличившаго живоносное преставление Матере Твоея Чистыя.

Благословенная Владычице, просвети мя светом Сына Твоего. Ангельский собор удивися, зря Тебе в мертвых вменившуюся, душу же в руце Бога предавшую, и с Богом возшедшую, Пренепорочная, со славою божественною в Небесная. Благословенная Владычице, просвети мя светом Сына Твоего. Почто радость со слезами, Богопроповедницы, растворяете? Пришед Близнец, свыше вразумляемь, приглашаше апостолом: видите вы пояс, и уразумейте, Дева воскресе от гроба.

15-10092017

Чтение канона

Пресвятая Богородице, спаси нас

Да провождают невещественный чинове небошественное в Сион Божественное тело Твое, внезапу же стекшеся апостол множество от конец, Богородице, Тебе предсташа абие, с нимиже, Чистая, Твою честную, Дево, память славим.

16-10092017

Приидите, воспоем, людие, Пресвятую Деву Чистую, из Неяже неизреченно пройде, воплощся Слово Отчее, зовуще и глаголюще, благословенна Ты в женах, блаженно чрево, вместившее Христа. Того святым рукам душу предавши, молися, Пречистая, спастися душам нашим.

Всечестное Твое успение, Пресвятая Дево Чистая, Ангел множество на Небеси, и человеческий род на земли ублажает, яко Мати была еси Творца всех Христа Бога, Того молящи не престай о нас, молимся, иже на Тя с Богом упование положших, Богородице Всепетая и Неискусобрачная.

17-10092017

Каждение на 9-й песни канона

Ирмос: Побеждаются естества уставы, в Тебе, Дево Чистая: девствует бо рождество, и живот предобручает смерть; по рождестве Дева, и по смерти жива, спасаеши присно, Богородице, наследие Твое. Дивляхуся Ангельския силы, в Сионе смотряюще своего Владыку, женскую душу руками носящаго, пречисто бо Рождшей, сынолепно провозглашаше: гряди, Чистая, с Сыном и Богом прославлена буди.

Приими от нас песнь исходную, Мати живаго Бога, и светоносною Твоею и Божественною осени благодатию, воинству – победительная, христолюбным людем – мир, грехов оставление – поющим, и душам спасение подающи.

18-10092017

Апостоли, от конец совокупльшеся зде, в Гефсиманстей веси погребите тело Мое, и Ты, Сыне и Боже Мой, приими дух Мой.

19-10092017

Священным ученииком, в Гефсиманию тело Матере Божия носящим, песнь, юже возглашаю, прилична есть. Сего ради Христа Матери, воистинну, Единей Богоотроковице возопийте: востани, о Владычице, подающи всем велию милость.

20-10092017

Погребальная процессия с Плащаницей Божией Матери под  проводной  колокольный звон обходит вокруг храмов

21-10092017

От конец стекошася апостолов лучшии, богоначальным мановением, погребсти Тя, и от земли вземлему Тя к высоте зряще, глас Гавриилов радостию вопияху Тебе: радуйся, Носило Божества всего. Радуйся, Едина, земная сВышними Рождеством Твоим совокупльшая.

22-10092017

Яже Живот рождшая, к жизни преминула еси, честным успением Твоим, безсмертней, дориносящим Тя Ангелом, Началом и Силам, апостолом и пророком, и всей твари, приемшу же нетленными дланьми Сыну Твоему, непорочную душу Твою, Дево Мати Богоневесто.

23-10092017

Возвращаемся в Обитель

24-10092017

Крестный ход возвращается к «месту погребения Матери Божией»

25-10092017

Благообразных ученик лик ныне Божественный, о Честная, нескверное тело Твое слезами чистыми омочив, яко ароматы, во гробе, честне погребая, положи, но тридневно преставилася еси, Владычице, подающи мирови Божественную милость.

26-10092017

Батюшка помазует елем у Плащаницы

27-10092017

На безсмертное Твое успение, Богородице, Мати Живота, облацы апостолы по воздуху восхищаху, и, по миру разсеянныя, во едином лице предсташа пресвятому Твоему телу, еже и погребше честно, глас Тебе Гавриилов поюще вопияху: радуйся, Благодатная, Дево, Мати Безневестная, Господь с Тобою. С ними же, яко Сына Твоего и Бога нашего, моли спастися душам нашим.